أيوه الصوابع ..قريتها صح...مش الطوابع..بالصاد ياأحفاد لغة الضاد..صوابع جمع صباع
عضو الجسد صاحب الشخصيه المستقله..اللي له ورق رسمي في وزارة الداخليه ومن خلاله يتم التعرف علينا بعمل الفيش والتشبيه
الصباع المشار اليه بالبنان....سفير اللغه العربيه في معجم اللغه الاجنبيه باسمه الاصلي....نقول علي الموز بنانا وهو ماقصده أهل الغرب بهذه الفاكهه حين أطلقوا عليها اسم بنان حين سالوا العرب عنها وقالوا ..أه التي تشبه البنان وظن البحاره الاجانب ان اسمها بنان....ولذلك نسميها نحن المحدثون بنانا يعني صباع موز.....المهم الأصابع كتير.....منها صباع روج التي تشتريه الانثي ليمسحه حبيبها ولا تخلو شنطه حريمي منه لاعاده أعمار ما خربه أدم أاكل الالوان......وفيه كمان صباع الطباشير والصباع المدوّحس والصباع الزياده اللي ممكن يعفيك من التجنيد
وماننساش تمثال أبو اصبع والنكته الشهيره لرسام الكاريكاتير حاكم عن بياع التين الشوكي اللي واقف قدام التمثال يقول بتشاور علي أنهي واحد علشان أقشرهالك؟؟؟؟
والطريف أن كل صباع له اسم وله وظيفه خاصه به لوحده!!!!في الكف الايمن تماثل أو تعارض أحيانا وظيفته في الكف الايسر
الخنصر : الصغير شبه ( الضيف احمد الله يرحمه) خفيف الدم..وأحنا صغيرين كان علامة الخصام لما نتفل عليه بالهوا
البنصر : مكان أول كلبش في حياتك علي رأي عمر طاهر وبينه وبين بنصر الكف اليسري اتفاقيه جنائيه عندما ينتقل القيد الذهبي لتنفيذ الحكم بالزواج الي بنصر اليد اليسري
الوسطي : المعارض ...قليل الحياء والمسحوب من لسانه ..سبب كتير من المشاكل مع أخوه الايسر
السبابه : وكيل النيابه المشاكس...أشطر أخواته..دايما علي لسانه كلمة أنت ...انت متعرفش انا أبن مين ف البلد دي.....والأنا عنده عاليه قوي
الابهام : طور الله ف برسيمه..عمال يبصّم علي بيع مايملك وهو مش فاهم حاجه...سرحان عبد البصير وبيشرب شاي ماركه كده....ولما يكون رايق قوي يعمل لك اشاره تفهم منها أوكي...علي ايه جاته نيله
والصوابع لها ذاكره حديديه..معظم ارقام التليفونات وأرقام ماكينات الصرف الألي حافظينها صمّ ويمكن احنا مش فاكرينها ..لكن علي الموبايل يكروها كرّ.....موهبه عجيبه ياأخي
لذلك تعامل الصوابع معامله ملكيه باديكير ودلع طال صوابع الرجلين مع أنهم بيئه ومن مناطق عشوائيه وأكتر مايرجي منهم اللعب تحت الطرابيزات والمناغشه تحت اللحاف علي شرط يكونوا نضاف.....أحنا مش ناقصين أنفلونزا الصوابع
هوايه جمع الصوابع هوايه جديده وبفكّر أعملها جمعيه واسميها الصوابع الذهبيه بس خايف ليفتكروا أنها جمعيه للحلاقين بس...
طولّت عليكم....أيوه وكمان صوابعي تعبت من الكتابه
تصبعوا علي خير
